पाऊस

आठवतोय तुला तो पाऊस????
मी.........
मी त्या पावसात चिंब भिजायची,
रानभर धावत सुटायची,
पावसाचा प्रत्येक थेंब झेलण्यासाठी
त्याला कवेत घेण्यासाठी...........
तू........पण तू.........
तू आडोशालाच उभा रहायचास,
एकटाच..!!कोरडा.............
कदाचित, पाऊस तुला कळलाच नसावा.
त्या पावसासारखीच मी,
कवितेतून तुझ्यावर बरसायची,
पण तू.........
तू कधी चिंब भिजलाच नाहीस,
तू फक्त "कोरडा"च राहिलास......
तेव्हाही आणि आत्ताही
कदाचित त्या पावसाचं बरसणं
आणि माझं तरसणं
तुला कधीच समजल नाही........
०५ जुन, २००८.

वचन

स्वप्नात पहावेसे वाटते तुला,
स्वप्नात तुझ्यासोबत जगण्याची,
थोडीशी परवानगी देशील???

हातामध्ये हात नको,
आयुष्याची साथ नको,
बोटांचा एक स्पर्श आणि आयुष्याचा एक क्षण देशील???
स्वप्नात तुझ्यासोबत जगण्याची,
थोडीशी परवानगी देशील???

प्रेमाचीही बात नको,
प्रणयाची ती रात नको,
बोलाक्या तुझ्या डोळ्यातले थोडेसेच प्रेम देशील???
स्वप्नात तुझ्यासोबत जगण्याची,
थोडीशी परवानगी देशील???

सत्य मला मान्य आहे,
पण स्वप्न फक्त माझचं आहे,
स्वप्नात नित्य येण्याच,
आज मला तू वचन देशील????
स्वप्नात तुझ्यासोबत जगण्याची,
थोडीशी परवानगी देशील???